უყურადღებობა – ეს რაღაც ამოუცნობი ფენომენია და პრაქტიკულად არ არსებობს ადამიანი, ვისაც მასთან შეხება არ ჰქონია – მისი მხრიდან იქნებოდა ეს თუ მის მიმართ. საოცარი კი ისაა, რომ პრაქტიკულად ყოველთვის სუბიექტური დამოკიდებულებაა ჩვენს ყოველდღიურობაში ეგრერიგად ფეხმოკიდებულ ამ რეალობასთან – უყურადღებობასთან მიმართებაში და საკმაოდ ხშირად, მხოლოდ და მხოლოდ, საკუთარი გემოვნება-გადასახედიდან ხდება შეფასების გაკეთება თუ დამოკიდებულების გამოხატვა და მას, არც თუ იშვიათად, ძალზე უცნაური “პრაგმატული” დატვირთვაც ახლავს თან. დიახ, არავის მოსწონს და გულიც ძალიან წყდება ხოლმე, როცა ივიწყებენ, უყურადღებოდ დატოვებენ, მით უფრო, როცა ამ დროს მხარში ამოდგომის მოლოდინი უფროა, ხოლმე, როცა, თუნდაც ერთი სიტყვა მხარდაჭერისა, მართლაც ყველაფერს ნიშნავს… და ამ დროს, თითქოს, გულწრფელობა და ადამიანობაც კი უფასურდება…
ისე კი, ვინც ერთგვარ ნაჭუჭში იკეტება, რომ სხვისი გაჭირვება არ დაინახოს, შემდგომში სხვაც ვერ ხედავს, უკვე, მის გაჭირვებას, რამეთუ ზუსტად ის ნაჭუჭი აღიმართება, თითქოს, კედლად და როცა ვინმეს ივიწყებ, დროთა განმავლობაში შენც გივიწყებენ…
ცხოვრება კი მუდმივად განიცდის ცვლილებას, მით უფრო როლების…
P.S. ახლა ნამდვილად არ მსურს იმის გახსენება, თუ რაოდენ უსიამოვნო იყო ჩემთვის უმადურთა, ორპირთა თუ მედროვეთა დანახვა ნიღბის გარეშე, მით უფრო მათი, ვისი გაჭირვება ყოველთვის გულთან ახლოს მიმქონდა და მხარშიც არაერთხელ ამოვდგომივარ, ეს ტკივილი კი უფრო გამიძლიერდა, როცა არაერთი ფაქტის მოწმე გავხდი (საკმაოდ ბლომადაა ამ ტკივილით აღსავსე პუბლიკაციები ინტერნეტში, სოციალურ ქსელებში, რეალურ ცხოვრებაში კი ბევრად უფრო ხშირად დავინახე) უყურადღებობისა თუ ადამიანის გაჭირვებაში მიტოვების – ჩემი ახლობლები, ნაცნობ-მეგობრები იქნებოდნენ ისინი თუ სრულიად უცხონი. გული ძალიან, ძალიან მტკივა ამის გამო – ნუთუ ასე ეიოლებათ ზოგ-ზოგებს “სხვისი ჭირი – ღობის ჩხირის” სტილით ცხოვრება? განა დათესილი უყურადღებობა ნაყოფად პატივისცემასა და დაფასებას მოიტანს? არა მგონია! ადამიანის მიერ დათესილი უყურადღებობა სხვისთვის თუ ცხოვრებისეული გამოცდა იქნება, მისთვის “სარკის ეფექტის” – ნაყოფი!
© ფეისბუკის პირადი გვერდიდან გადმოტანილი სტატუსი
ედნარ მგელაძე (Ednar Mgeladze: My fotos and internet-coordinates)
თემატიკურად მსგავსი სხვა პუბლიკაციები:
ხე მარადისობისა – მადლი და დაფასება
ღირებულებები და პასუხისმგებლობა
ფიქრები ადამიანურ ურთიერთობებზე
Edi Line Blog 