Monthly Archives: მაისი 2017

ტოტალიტარიზმის ეპოქიდან “კითხვის ნიშნების” ეპოქამდე


უახლოეს წარსულში საქართველომ მოასწრო არაერთი ურთიერთგანსხვავებული ეპოქის გავლა, რამაც წარუშლელი კვალი დატოვა ისტორიაში და დღემდე ახდენს გავლენას ქვეყნის განვითარებაზე. შევეცდები მოკლედ ჩამოვაყალიბო ჩემი მოსაზრებები აღნიშნულთან დაკავშირებით:
ტოტალიტარიზმის ეპოქა როგორი შემართებითაც გადატეხა წელში ეროვნულმა ერთიანობამ, ისეთივე მონდომებით დაანგრია ერის ეს მოკლევადიანი ერთობა, შედეგად ქვეყანამ, უკვე, ტოტალური განუკითხაობის ხანა ეგემა, ძმათამკვლელი ომის სირცხვილიც, ორპირობაც და ღალატიც, ღვთის რისხვამ კი ერს საკუთარ სულში ჩაახედა, თუმცაღა ბევრმა თვალი ვერ გაუსწორა რეალობას და “შვება” თვალის დახუჭვაში ჰპოვა… აღვირახსნილმა კორუფციამ, უშუქობამ, უგზოობამ, მოსახლეობის პერმანენტულმა გაღატაკებამ თუ სხვა ათასმა უმსგავსობამ ერი პრაქტიკულად დააჩოქა… უკვე შეუძლებელი ხდებოდა ყოველივე ამის ატანა და ამ წუმპემ ერს გაბრძოლებისკენ უბიძგა, მერე შუქიც გაჩნდა, ოპტიმიზმიც, იმედიც, ბევრი რამ აშენდა და გალამაზდა, პატარა ბავშვები მომრავლდნენ ეზოებში, მომღიმარმა სახეებმაც იმატა, თანდათან დაჩოქილი ერიც ამაყად წამოიმართა და წელში დაიწყო გასწორება, თუმცა მოულოდნელად ისეთი ალიყური იწვნია, რომ ისევ ძირს დაენარცხა – ძალაუფლების ტკბობაში “ჩაძირულებმა” ადამიანებს ერთმანეთისადმი ნდობა დააკარგვინეს, ტოტალურმა მოსმენებმა, დასმენებმა, “ჩაშვებებმა”, სხვის თეთრეულსა თუ ლოგინში ნერწყვგადმოდინებულმა ქექვა-ცქერამ ერს ღირსებაც დააკარგვინა, ძალადობა თუ დამცირებაც გაუადვილდათ ძალაუფლებით გონებაარეულებს, თავისიანებად თუ სხვისიანებად, ხელშეუხებლებად თუ ჩარეცხილებად დაყვეს საზოგადოება და ისე შეიყვარებდნენ თუ მოიძულებდნენ ადამიანებს, ისე გახრწნიდნენ თუ გარიყავდნენ, ცოდვა-მადლის ისეთი ცინიკური “ფორმულა” გამოიგონეს, რომ ადეკვატურობის არსმა საბოლოოდ დაკარგა აზრი… ჰოდა, ამოუვიდა ყელში, ყოველივე ეს, ერს და ალიყურის საპასუხოდ ისეთი მწარე მუშტი აგემა ხელისუფლებას, რომ, შემდეგ, ოპოზიციაში მყოფი დროდადრო თავისით ეცემა, ხოლმე, ნოკდაუნში, თუმცაღა დაბარბაცებულიც კი არ აძლევს მოდუნების საშუალებას მოქმედ ხელისუფლებას… არადა, წლების წინ, ისეთი რწმენით იყო გამსჭვალული ერი, ისე სჯეროდა ბევრი რამის და თავადაც ისე ლაღად დაიწყო ოცნება ბედნიერ მომავალზე, რომ დღევანდელი რეალური შედეგის გამო, დაბნეულმა, აღარც კი იცის პასუხი ვის მოსთხოვოს – მმართველ ძალას, კონკრეტულ გავლენიან პიროვნებას თუ საკუთარ თავს. წლების წინ რამდენ რამეში ეთანხმებოდა მოსახლეობა მაშინდელ ოპოზიციას, რამდენი პრობლემის მოგვარების იმედი ჰქონდა, როგორ სჯეროდა, რომ უსამართლობის განცდა აღარ ექნებოდა, რამდენი კარგი შანსი იქნა ხელიდან გაშვებული, რამდენი შეცდომა იქნა დაშვებული, მათ შორის, საკადრო სფეროში, ტალახის სროლის, წინა ხელისუფლების დროინდელი, აზარტი უფრო მეტი შემართებით იგრძნობა და ჩემი აზრით, კიდევ ერთხელ, ბევრი რამით დაიღალა ერი… ნათქვამია “ნეტარ არიან მორწმუნენიო”, მაგრამ ნეტავ იმათ ტვინში ჩამახედა, ვინც დღეს პრობლემებს ვერ ხედავს, ხოლო იმათ ტვინში ჩახედვა საერთოდაც არ მსურს, ვისაც აბსოლიტურად ყველა პრობლემის სათავე მხოლოდ ე.წ. “9-წლიანი მმართველობის ეპოქა” მიაჩნია. ყველა ეპოქის ფურცელი ადრე თუ გვიან, მაინც, გადაიშალა და ყველას თავისი მოეკითხა, მიმდინარე ეპოქის ფურცელსაც გადაშლის საზოგადოება, ეპოქისას, რომელსაც მე, თუნდაც, “კითხვის ნიშნების” ეპოქას დავარქმევდი…

 

© ფეისბუკის პირადი გვერდიდან გადმოტანილი სტატუსი

edi (163x156, 30Kb)
ედნარ მგელაძე (ინტერნეტის ლაბირინთებში)

Advertisements

ვარდობისთვე


სასიამოვნო ამინდი კიდევ უფრო გვიძლიერებს სიმშვიდის განცდას, ჩიტების საოცარი ჭიკჭიკი ლაღ ფერებს მატებს გამოღვიძებულ ბუნებას, არემარე ცოცხალი ფერებით აივსო, გაზაფხულის ამ უმშვენიერესი თვის, რომანტიკული მაისის, ჩვენს ცხოვრებაში შემობრძანებამ უფრო მეტი პოზიტივი უნდა მოიტანოს და მას, თუნდაც, ხელისშემშლელების მთელი არმია გადაეღობოს წინ, მაინც უფრო მეტი შემართებითა და პრინციპულობით უნდა შევეჭიდოთ ნებისმიერ პრობლემას. უდავო ჭეშმარიტებაა და ყოველი ჩვენთაგანისათვის უცხადესია, რომ სიკეთე, პატივისცემა და სიყვარულია, ზუსტად, ის ფასდაუდებელი ღირებულებები, რომლითაც საზოგადოებამ, გაძლიერებული პასუხისმგებლობის გრძნობის თანხლებით, ღირსეული მომავალი უნდა ააშენოს ჩვენი შთამომავლობისთვის, წინაპართა გმირული წარსულის წინაშე ვალმოხდილად რომ იგრძნოს თავი…
ვარდობისთვე ტყუილად კი არ შეარქვეს, ამ თვეს, ჩვენმა წინაპრებმა, ზუსტადაც რომ ვარდთან ასოცირდება წმინდა, გულწრფელი და ამაღლებული გრძნობები, მაისია ის კულმინაცია, როცა გაზაფხულის შემობრძანებით გამოღვიძებულ და გაძლიერებულ რომანტიკულ განწყობას ვიმკის, სითბოთი, სიხარულითა და სიყვარულით გაჯერებულს, გულიც რაღაცნაირად სხვანაირად, მართლაც განსაკუთრებულად, დადებითი ემოციებით აღსავსე გვიცემს ყველას, უფრო მეტად იმედიანი განწყობით ვიმუხტებით და მთელი შემართებით ვაგრძელებთ ბედნიერი მომავლის აშენებას…
ვარდობისთვის დადგომას გილოცავთ ჩემო თანამემამულენო, ჩემო ახლობელო ადამიანებო, ჩემო ძვირფასო მეგობრებო!
სიხარული, სიყვარული და ბედნიერება არ მოგკლებოდეთ ცხოვრებაში!
1 მაისი, 2017 წ.

 

© ფეისბუკის პირადი გვერდიდან გადმოტანილი სტატუსი

edi (163x156, 30Kb)
ედნარ მგელაძე (ინტერნეტის ლაბირინთებში)

%d bloggers like this: